العدل بين أطفالي لا تعني المساواة في كل شئ❌
العدل مش معناه المساواة في كل شي ❌❌
🚫 أشمعنى.. كلمة مش مسموح بيها في بيتنا! ❌
في مرحلة ما، بيبدأ الأطفال وخاصة الإخوات يبصوا لبعض؛ “دي خدت أكتر”، “أنا عاوز اللي معاها”، وهكذا..
لو مقفلناش المجال ده، للأسف هندخل في دائرة مفرغة محصلتها إن دايماً هيكون في عدم رضا في كلامهم. وزي ما بيبصوا لبعض، هيبصوا لغيرهم بره ويقارنوهم بنفسهم. وهل أضمن ظروفنا إن دايماً هيكون في وفرة؟ ولا قدر الله لو في ضائقة ممكن نمر بيها، هيتصرفوا إزاي؟
هل معنى كده أحرم ولادي؟
الولاد ليهم الحق الكامل في:
الأكل والشرب.
الرعاية اللي تضمن نموهم بصحة.
وطبعاً الحب والاهتمام والتربية.
بالنسبالي، دول أساسيات مفيهاش نقاش.
طب و الرفاهيات؟
الرفاهيات لازم يكون ليها آلية؛ مينفعش كل حاجة تكون متاحة طول الوقت وطلباتهم أوامر. لازم وقت ما أقول “مش مناسب لينا نجيب الحاجة دي دلوقتي” يتقبلوا ده.
وده طبعاً مش بيجي بسهولة، بيجي بالتدريب؛ يعني أوقات بقول “لا، مش مناسب لينا” حتى لو أقدر أوفرلهم ده، علشان يفهموا إن ده ممكن يحصل عادي في يوم من الأيام.
طيب بعمل إيه لو حد من ولادي بص لأخوه؟
برفض تماماً كلمة “أشمعنى”.
بقوله: “كلمني عن احتياجك أنت”.
بوضحله: “قولي أنا محتاج كذا يا ماما، متجبش سيرة أختك (أو متجبيش سيرة أخوكي)”.
لأن الولاد يا جماعة مش طول الوقت ينفع نكون عادلين معاهم بمعنى (المساواة المطلقة)، لأن فعلاً احتياجاتهم مختلفة:
هل الطفل اللي عنده سنتين احتياجاته نفس احتياجات الطفل اللي عنده 7 سنين في الأكل والشرب والملبس وحتى التعليم؟
هل مصروف طفل عنده 10 سنين هيكون نفس مصروف طالب ثانوي؟
لازم أركز مع الولاد من بدري إنهم يتعلموا يعبروا عن احتياجاتهم الخاصة بيهم، وميقارنوش نفسهم بالآخرين، سواء جوه البيت أو خارج البيت.
وكمان نقطه مهمه جددا يا جماعه
لازم نركز في الوسط الاجتماعي اللي بنحط ولادنا فيه
اوعو تحطوهم في وسط مستوي اجتماعي اعلي منكم
لان المقارنات هتكون اكبر بكتير والرفاهيات بالنسبالكم ربما تكون اساسيات لناس تانيه ولادكم وسطهم
قولولي رايكم وبتتعاملوا ازاي مع كلمه اشمعني ؟
#ماما_نغم #nagham_book_store #تربية #تربيةايجابية
